Qirg‘iziston yangi davlat madhiyasini tanlamoqda
Bu bo‘yicha respublikada tanlov eʼlon qilingan.
Hukumat hozirgi madhiyani eskirgan, ijro etish qiyin va zamonaviy ruhga mos emas deb hisoblamoqda.
Madaniyat, axborot, sport va yoshlar siyosati vazirligi madhiyaning yangi matni va musiqasi uchun tanlov eʼlon qildi. Yangi madhiyaning mamlakatning tarixiy merosi, madaniy anʼanalari va milliy birdamligini yaxshiroq aks ettirishi maqsad qilingan.
Loyihalar tantanavorlik, vatanparvarlik, oson qabul qilinishi va qirg‘iz adabiy tili meʼyorlariga mosligi kabi mezonlar asosida baholanadi.
Tanlovni parlament deputatlari, rasmiylar, yozuvchilar, bastakorlar va madaniyat arboblaridan iborat komissiya ko‘rib chiqadi. Agar munosib variantlar topilmasa, tanlov bekor qilinishi mumkin.
Madhiyani o‘zgartirish g‘oyasi 2024-yil oktyabr oyida paydo bo‘ldi. O‘shanda parlament spikeri Nurlanbek Turgunbek yangi bayroq qabul qilingani sababli mamlakatga yangi madhiyaga ham ehtiyoj borligini bildirgan edi. Prezident Sadir Japarov tashabbusni qo‘llab-quvvatlab, buning hech qanday muammosi yo‘qligini taʼkidladi.-
