Ispaniyada odam savdosining yirik tarmog‘i fosh etildi
Ular 1000 dan ortiq ayollarni aldov yo‘li bilan sotgan.
Ispaniya politsiyasi odam savdosi bilan shug‘ullangan yirik jinoiy guruhni ushladi. AFP agentligining xabariga ko‘ra, ushbu guruh so‘nggi bir yil ichida 1000 dan ortiq ayollarni noqonuniy operatsiyalarga jalb qilgan.
Jinoyatchilar asosan Janubiy Amerikadan, xususan, Kolumbiya va Venesueladan kelgan ayollarni yolg‘on ish takliflari bilan Ispaniyaga jalb qilgan. Ularning aksariyati jinsiy ekspluatatsiya qurboniga aylangan.
Politsiya operatsiyasi natijasida 48 nafar ayol qutqarilgan va 48 kishi qo‘lga olingan. Ulardan uch nafari – ikki kolumbiyalik va bir ispaniyalik – guruh yetakchilari ekani maʼlum bo‘ldi. Hibsga olinganlarning aksariyati Ispaniyaning Alikante shahrida saqlanmoqda.
Jabrlangan ayollar farroshlik yoki go‘zallik salonlarida ish topish vaʼdasi bilan aldangan. Ammo Ispaniyaga yetib kelganlaridan so‘ng jinsiy ekspluatatsiya qilinadigan klublarga yuborilgan. Ularga kuniga atigi ikki soat tashqariga chiqishga ruxsat berilgan, qolgan vaqt esa videokuzatuv ostida bo‘lishgan.
Hozirda politsiya tergovni davom ettirmoqda, gumonlanuvchilardan olti nafari tergov izolyatoriga joylashtirilgan.
