O‘zbekistonda Ramazon oyi 1-martdan boshlanadi
Ramazon oyini munosib o‘tkazish bo‘yicha Prezident qarori qabul qilindi.
O‘zbekistonda muborak Ramazon oyi 1-mart, shanba kuni boshlanishi belgilandi. Bu haqda Prezidentning "Muborak Ramazon oyini munosib tarzda o‘tkazish to‘g‘risida" gi qarorida qayd etilgan.
Qarorga ko‘ra, ushbu fazilatli oy “Ramazon – saxovat, birdamlik va bag‘rikenglik oyi” g‘oyasi asosida o‘tkaziladi.
Xususan:
- Ehtiyojmand oilalar va ilm yo‘lida izlanayotgan yoshlarga yordam berish tashabbuslari qo‘llab-quvvatlanadi.
- Oila mustahkamligi, mahallalarda o‘zaro hurmat va ishonch muhitini kuchaytirish hamda mehr-oqibat qadriyatlarini rivojlantirishga alohida e’tibor qaratiladi.
- Atrof-muhitni asrash, muqaddas qadamjo va ziyoratgohlarni obodonlashtirish, daraxt ko‘chatlari ekish hamda Ramazon oyiga xos tadbirlarni isrofgarchiliksiz tashkil etish targ‘ib qilinadi.
Shuningdek, Ramazon oyining ma’naviy va ijtimoiy ahamiyatini yuksaltirishga qaratilgan ezgu tashabbuslar qo‘llab-quvvatlanadi.
