Qozog‘istonda 2 yoshli bola 105 ta magnit yutib yubordi
Hozirda bolaning ahvoli qoniqarli ekani aytilmoqda.
Qozog‘istonning Olmaota shahrida shifokorlar 2 yoshli bolaning oshqozonidan 105 ta magnit sharchasini olib tashlashdi.
Sog‘liqni saqlash boshqarmasi maʼlumotiga ko‘ra, 20 fevral kuni Olmaota shahridagi Bolalar shoshilinch tibbiy yordam markaziga 2 yoshli bola yot jism yutib yuborish ehtimoli bilan olib kelingan.
Ota-onasining so‘zlariga ko‘ra, bola taxminan bir hafta oldin mehmondorchilikda bo‘lib, metall magnitlarni yutib yuborgan bo‘lishi mumkin. Ularning aniq soni nomaʼlum bo‘lgan.
Shifokorlar rentgen tekshiruvida bolaning qorin sohasida 6,2 × 2,2 sm o‘lchamdagi zich metall jismi borligini aniqlashdi. Bemor shoshilinch ravishda kasalxonaga yotqizilgan. Mutaxassislar avval magnitlarni endoskopik yo‘l bilan olib tashlashga harakat qilishdi, ammo ularning bir-biriga zich yopishib qolganligi sababli buni amalga oshirib bo‘lmadi.
Shifokorlar jarrohlik amaliyoti – laparotomiya va gastrotomiya o‘tkazishga qaror qilishdi. Operatsiya davomida bolaning oshqozonidan 105 ta magnit sharchasi chiqarib olindi.
Operatsiyadan so‘ng bola reanimatsiya bo‘limiga, keyinchalik esa jarrohlik bo‘limiga o‘tkazildi. Shifokorlarning aytishicha, hozirda bolaning ahvoli qoniqarli.
