Toshkentda qiz o‘zini kanalga tashladi: inspektorlar uni qutqarib qoldi
U shifoxonaga yetkazilgani, hozirda ahvoli barqarorligi bildirildi.
Toshkent shahridagi Bo‘zsuv kanaliga o‘zini tashlagan qiz profilaktika inspektorlari va voqea guvohi bo‘lgan fuqaro yordamida qutqarib qolindi. U shifoxonaga yetkazilgan, hozirda ahvoli barqaror.
Poytaxt IIBB xabariga ko‘ra, voqea Bo‘zsuv kanalining aholi sayr qilishi uchun mo‘ljallanmagan yopiq qismida sodir bo‘lgan. Shu hududda bo‘lgan fuqaro qizning suvga sakraganini ko‘rib, zudlik bilan “102” xizmatiga murojaat qilgan.
Xabar kelib tushgach, Yakkasaroy tumani Tepa mahallasiga biriktirilgan profilaktika inspektorlari voqea joyiga yetib borgan. Qidiruv davomida qiz kuchli suv oqimi va aylanma harakatlar sabab kanalning chekka qismiga oqib borib qolganini aniqlashgan.
Shundan so‘ng profilaktika inspektori Ortiq Omonov suvga tushib, qizni qutqarishga kirishgan. Ikkinchi xodim Qudrat Rasulov esa uni suvdan chiqarib olishga yordam bergan.
Qutqarilgan qizga voqea joyida birinchi yordam ko‘rsatilgan. U ko‘p miqdorda suv yutib yuborgani sababli qayt qilgan. Keyinchalik 5-sonli shahar shifoxonasiga olib borilgan.
Tibbiy yordamdan so‘ng qizning shaxsi aniqlanib, Toshkent viloyatining Yangiyo‘l tumanida yashovchi ota-onasi bilan bog‘lanilgan. Qiz shifoxonadan keyin ota-onasiga topshirilgan. Hozirda uning ahvoli barqaror ekani ma’lum qilindi.
