Arab xurmosining inson organizmiga foydalari
Xurmo yurak, miya va suyaklar uchun eng foydali mevalardan biridir.
Arab xurmosi – dunyoning turli tropik mintaqalarida o‘stiriladigan mazali va foydali meva bo‘lib, ko‘pincha quritilgan holda iste’mol qilinadi. U o‘zining boy vitamin va mineral tarkibi bilan ajralib turadi.
Xurmo uglevodlarga eng boy mevalardan biri bo‘lib, ularning miqdori 60 foizdan oshadi. Biroq, tarkibidagi niatsin, riboflavin va pantotenik kislotalar uglevodlarni hazm qilishni osonlashtiradi va qondagi glyukoza miqdorini tartibga soladi. Shuningdek, xurmo tarkibida organizm uchun zarur bo‘lgan 23 xil aminokislotalar mavjud.
100 gramm xurmo quyidagi ozuqaviy moddalarga ega:
- Kaloriya – 277 kkal
- Uglevodlar – 75 g
- Elyaf (kletchatka) – 7 g
- Protein – 2 g
- Kaliy – RDI ning 20 foiz
- Magniy – RDI ning 14 foiz
- Mis – RDI ning 18 foiz
- Marganes – RDI ning 15 foiz
- Temir – RDI ning 5 foiz
- Vitamin B6 – RDI ning 12 foiz
Xurmoning sog‘liq uchun foydalari
1. Yurak va qon tomir tizimiga foydasi
Xurmodagi kaliy tanadan natriyni chiqarib, qon bosimini me’yorda ushlab turishga yordam beradi. Elyaf miqdori yuqori bo‘lgani uchun u xolesterin darajasini pasaytirib, yurak-qon tomir kasalliklari xavfini kamaytiradi.
2. Ovqat hazm qilish tizimini yaxshilaydi
Xurmo tarkibidagi kletchatkalar ovqat hazm qilish jarayonini yaxshilaydi, qabziyatning oldini oladi va qondagi qand miqdorini nazorat qiladi.
3. Kuchli antioksidant manbai
Arab xurmosi antioksidantlarga boy bo‘lib, ular organizmni erkin radikallardan himoya qiladi va yallig‘lanish jarayonlarini kamaytiradi. Eng muhim antioksidantlari:
- Flavonoidlar – yallig‘lanish, Alsgeymer va ayrim saraton turlarining xavfini kamaytiradi.
- Karotenoidlar – yurak va qon tomirlarini himoya qiladi.
- Fenolik kislota – saraton va yurak kasalliklari xavfini pasaytiradi.
4. Miya faoliyatini yaxshilaydi
Tadqiqotlar shuni ko‘rsatadiki, xurmo Alsgeymer kasalligining oldini olishga yordam beradi. U miya hujayralari orasidagi aloqani buzadigan blyashka hosil bo‘lishini kamaytirib, xotira va o‘rganish qobiliyatini yaxshilaydi.
5. Tabiiy energiya manbai
Xurmo tabiiy shakar – fruktoza manbai bo‘lib, energiyani tez tiklashga yordam beradi. Uni oq shakar o‘rnida iste’mol qilish mumkin.
6. Suyak salomatligi uchun foydali
Xurmo tarkibida fosfor, kalsiy, magniy va kaliy bo‘lib, ular suyaklarning mustahkamligini ta’minlaydi va osteoporozning oldini oladi.
Kuniga 2-3 dona xurmo iste’mol qilish orqali: suyak salomatligini yaxshilash, yurak-qon tomir kasalliklarining oldini olish, ovqat hazm qilishni yaxshilash, xotira va miya faoliyatini qo‘llab-quvvatlash, yoshroq ko‘rinish va immunitetni mustahkamlash mumkin.
Arab xurmosi – tabiiy shirinlik bo‘lib, u organizm uchun muhim vitamin va minerallarni o‘z ichiga oladi. Uni me’yorida iste’mol qilish orqali ko‘plab kasalliklarning oldini olish va umumiy salomatlikni mustahkamlash mumkin.
