Ertalab nonushta qilmaslikning zararlari aniqlandi
Bu odat yurak kasalliklari va ortiqcha vazn xavfini oshiradi.
Mutaxassislar ertalab nonushta qilmaslik metabolik sindrom, 2-toifa qandli diabet va arterial gipertoniya kabi kasalliklarning rivojlanishiga sabab bo‘lishi mumkinligini ta’kidlamoqda. Metabolik sindrom tana vaznining ortishi, yuqori xolesterin, qon bosimi oshishi va insulinga sezgirlikning pasayishi bilan kechadi. Ushbu holat umr davomiyligining qisqarishiga hamda sog‘liq sifatining yomonlashishiga olib kelishi mumkin.
Ispaniyada o‘tkazilgan uch yillik tadqiqot natijalariga ko‘ra, to‘yimli nonushta qilgan kishilar nonushta o‘tkazib yuborganlarga qaraganda kamroq tana yog‘iga ega bo‘lishgan. Kamida 400 kaloriya iste’mol qilgan odamlarning tana massasi indeksi pastroq bo‘lib, bel sohasida ortiqcha yog‘ kamroq to‘plangan.
Nyu-York universiteti olimlari esa 40 yoshdan oshgan 34 ming kishini uzoq yillar kuzatib, erta nonushta qilganlarda yurak kasalliklari va saraton xavfi 6 foizga kamroq ekanligini aniqlagan.
Nonushtaning muhim foydalari:
Metabolizmni tezlashtiradi – tanadagi moddalar almashinuvini faollashtirib, ortiqcha vazn ortishining oldini oladi.
Qandli diabet va yurak kasalliklari xavfini kamaytiradi – qondagi shakar va xolesterin darajasini muvozanatlashga yordam beradi.
Energiya va diqqatni oshiradi – to‘g‘ri taqsimlangan ertalabki ovqat energiya beradi va kun davomida tetik bo‘lishni ta’minlaydi.
Olimlarning ta’kidlashicha, sog‘liqni saqlash va metabolik sindromning oldini olish uchun nonushta qilish odatini 40-50 yoshdan avval shakllantirish maqsadga muvofiq.
