Italiyada uylar 1 yevroga sotilmoqda
Bu orqali tarixiy markazlarni jonlantirish maqsad qilingan.
Italiyaning Adriatika dengizi va Gran-Sasso tog‘ tizmasi orasida joylashgan Penne shahrida uylarni atigi 1 yevroga sotish dasturi amalga oshirilmoqda. Shahar rasmiylari bu tashabbus orqali aholining kamayishini to‘xtatish va tarixiy markazni jonlantirishni maqsad qilgan. Hozirda shaharda 40 dan ortiq bo‘sh binolar yangi egalarini kutmoqda.
Dastur 2022-yilda boshlangan bo‘lib, hozirgacha olti uy, asosan italiyalik xaridorlarga sotilgan. Kelgusi haftalarda yana bir qancha uylar, jumladan, Uyg‘onish davriga tegishli tarixiy binolar ham sotuvga qo‘yilishi kutilmoqda. Ko‘pchilik bu uylar avval mahalliy fermer oilalariga tegishli bo‘lgan, ammo ular AQSh, Belgiya, Venesuela yoki yirik shaharlarga ko‘chib ketgan.
Boshqa shunga o‘xshash dasturlardan farqli o‘laroq, Penne shahrida xaridorlardan garov puli talab qilinmaydi. Bitta asosiy shart bor – xaridorlar uyni uch yil ichida ta’mirlashga majbur. Bundan tashqari, ta’mirlash jarayonida xaridorlarga mahalliy mutaxassislar – arxitektorlar, muhandislar va quruvchilar yordam berishadi.
