Prezident Rohat mahallasidagi sumalak saylida qatnashdi
Davlat rahbari, shuningdek, mahalla faollari bilan suhbatlashgan.
Yurtimizning barcha joylarida Navro‘z ayyomi ko‘tarinki ruhda kutib olinmoqda. Prezident Shavkat Mirziyoyev 20 mart kuni Bektemir tumani Rohat mahallasiga tashrif buyurib, bayram saylida qatnashdi.
Xizmat ko‘rsatish va savdoga ixtisoslashgan mahallada 4 ming nafar aholi yashaydi. Bandlikni taʼminlash bo‘yicha yangi tizimga muvofiq, banklar ishtirokida mahallaning ichki imkoniyatlari yuzaga chiqarilmoqda. O‘tgan yili yuzga yaqin aholi ishga joylashtirilgan, 256 nafari o‘zini o‘zi band qilgan, 13 nafari tadbirkorlik faoliyatini boshlagan. Ikkita ishlab chiqarish korxonasi, o‘nlab savdo va maishiy xizmat shoxobchalari odamlarga qulaylik yaratmoqda.
Prezidentimiz ushbu korxonalarni ko‘zdan kechirdi.
Mahallada ko‘chalar obod, xonadonlar saranjom-sarishta. Taʼlim va tibbiyot muassasalari, sport maydonchalari, o‘quv markazi, amfiteatr, hunarmandlar va axborot-kutubxona markazlari faoliyat yuritmoqda. Hozir, ayniqsa, nuroniylar maskani gavjum.
Davlatimiz rahbari ushbu maskanda tashkil etilgan sumalak saylida qatnashdi, mahalla faollari, nuroniylar bilan samimiy suhbatlashdi. Muloqotda joriy yilgi rejalar, jumladan, tinchlik-osoyishtalikni saqlash, tadbirkorlikni qo‘llab-quvvatlash, yangi ish o‘rinlari yaratish haqida so‘z yuritildi.
– Mahallangizdagi obodlikni, odamlarning kayfiyatini ko‘rib, mamnun bo‘ldim. Vaqti bilan barcha tumanlardagi imkoniyatlarni oshiramiz. Buning uchun eng asosiysi – tinchlik-ahillik kerak. Ilgari chegaralarimizda vaziyat qanday edi? Vazminlik bilan, siyosiy iroda bilan hamma masalalarga yechim topayapmiz. Barcha ishlarni quyi tizimda tashkil qilganimiz uchun 10 mingga yaqin mahallaning holati yaqqol namoyon. “Mahalla yettiligi” orqali xonadonga yetib borilayapti. Odamlarning daromadini oshirish, kambag‘allikni qisqartirish, yoshlar siyosatida hali ishlarimiz ko‘p. Shuning uchun taʼlimga, o‘g‘il-qizlarni o‘qitishga katta eʼtibor berishimiz kerak. Yoshlari bilimli va maʼnaviyatli jamiyat, albatta, farovonlikka erishadi, – dedi Shavkat Mirziyoyev.
Rohat mahallasida umumtaʼlim maktabi, bolalar musiqa va sanʼat maktabi, “Barkamol avlod” markazi, akademik litsey faoliyat yuritmoqda. Yaqinda yangi maktabgacha taʼlim tashkiloti qurib bitkazildi. Bular ham yoshlar maʼrifatini oshirishga xizmat qiladi.
