Xitoy Raisi Si Szinpin Shavkat Mirziyoyevga Navro‘z tabrigi yo‘lladi
Xitoy yetakchisi O‘zbekiston bilan do‘stlikni eʼtirof etib, tinchlik va farovonlik tiladi.
O‘zbekiston Respublikasi Prezidenti
Shavkat Mirziyoyev Janobi Oliylariga
Muhtaram Prezident janoblari!
Xitoy taqvimi bo‘yicha Yangi yil bayrami munosabati bilan yo‘llagan tabrigingiz uchun Sizga samimiy minnatdorligimni izhor etaman.
O‘zbek xalqining anʼanaviy Navro‘z bayrami munosabati bilan Xitoy hukumati va xalqi nomidan Sizga, O‘zbekiston hukumati va xalqiga samimiy tabriklarimizni yetkazmoqchiman.
Ming yillik tarixga ega Navro‘z bahor kelishi va tabiat uyg‘onishini ifodalab, o‘zbek xalqining baxtli hayotga, el-yurt birligiga va ravnaqiga intilishini aks ettiradi.
O‘tgan yil iyul oyida Ostonada bo‘lib o‘tgan SHHT sammiti doirasidagi samimiy va do‘stona uchrashuvimizda Xitoy-O‘zbekiston munosabatlari va turli sohalardagi hamkorlikni yana-da rivojlantirish bo‘yicha muhim kelishuvlarga erishdik, ikki tomonlama aloqalarning yangi yo‘nalishlarini belgilab oldik.
Erishilgan kelishuvlarimiz samarali amalga oshirilayotgani, ikki davlat o‘rtasidagi o‘zaro manfaatli hamkorlik izchil mustahkamlanib, eʼtiborga loyiq natijalar berayotganini mamnuniyat bilan taʼkidlayman.
Men Xitoy-O‘zbekiston munosabatlarini rivojlantirishga katta ahamiyat beraman va yaqin do‘stligimizni yuksak qadrlayman.
Siz bilan birgalikda barcha sohalardagi hamkorlikni ilgari surish, Xitoy va O‘zbekistonning yagona taqdir hamjamiyatini barpo etish ishlarini boyitish uchun harakat qilishga tayyorman.
Fursatdan foydalanib, Sizga, Janobi Oliylari, mustahkam sog‘lik, oilaviy baxt-saodat, davlat rahbari sifatidagi masʼuliyatli faoliyatingizda muvaffaqiyatlar, do‘st O‘zbekiston xalqiga esa tinchlik-osoyishtalik, bardavom taraqqiyot va farovonlik tilayman.
Hurmat bilan,
Si Szinpin,
Xitoy Xalq Respublikasi Raisi
