Qoraqalpog’istonda ilk bor “open air” konsert tashkil etildi
Unda Prezident yordamchisi ham ishtirok etdi.
“Kecha qadimiy Chilpiq qal’asida yangragan musiqa o‘tmish, bugun va kelajakni bog‘lovchi rishtaga aylandi. Qoraqalpog‘iston zaminida ilk bor ochiq osmon ostida – open air formatida – konsert tashkil etildi: pianist Kirill Rihter o‘z mahoratini Milliy simfonik orkestr jo‘rligida namoyish etdi.
Simfonik musiqa, Sharq she’riyati va xalqona ohanglar uyg‘unlashgan ushbu noodatiy tadbirni Nukus bilan jahon musiqa sahnasi o‘rtasidagi madaniy ko‘prik, deb atash mumkin.
“The Sands of Time” (“Vaqt qumlari”) konserti – Sharqning ulug‘ shoirlari Bobur, Navoiy, Umar Xayyom va Nodirabegim ijodidan ilhomlangan g‘oya mahsuli. Bu – abadiylikka daxldor va ayni paytda yangi nafas baxsh etuvchi, dunyoni maftun etishga qodir loyiha, desak mubolag‘a bo‘lmaydi!”, deb yozdi Saida Mirziyoyeva.
