AQSh va O‘zbekiston strategik sheriklikni mustahkamlashni muhokama qildi
AQSh O‘zbekiston bilan investitsiya va xavfsizlik sohalarida hamkorlikni kengaytirmoqchi.
Joriy haftada AQShning poytaxti Vashington shahrida bo‘lib o‘tgan uchrashuvda AQSh Davlat kotibi o‘rinbosari Kristofer Landau va O‘zbekiston Milliy xavfsizlik kengashi raisi o‘rinbosari Abdulaziz Komilov ikki davlat o‘rtasidagi strategik sheriklikni mustahkamlash masalalarini muhokama qilishdi.
AQSh Davlat departamenti matbuot kotibi Temmi Brusning bayonotiga ko‘ra, Kristofer Landau AQSh hukumati nomidan O‘zbekistonning mustaqilligi, suvereniteti va hududiy yaxlitligini doimiy qo‘llab-quvvatlashini yana bir bor ta’kidladi. Uchrashuv ikki davlat o‘rtasidagi ishonchli siyosiy muloqot yuqori darajada davom etayotganini ko‘rsatadi.
Shuningdek, Landau O‘zbekistonning fuqarolik atom energetikasi, muhim foydali qazilmalar va iqtisodiyotning boshqa yo‘nalishlaridagi investitsiya salohiyatini yuqori baholadi. U AQSh ushbu sohalarda hamkorlikni kengaytirishga katta qiziqish bildirayotganini aytdi.
Bundan tashqari, Landau AQShning O‘zbekiston bilan noqonuniy migratsiya va terrorizmga qarshi kurashishdagi hamkorligini alohida e’tirof etdi va bu yo‘nalishdagi doimiy hamjihatlik uchun minnatdorlik bildirdi.
