O‘zbekiston 26 ta zamonaviy samolyot xarid qiladi
Yangi Airbus va Boeing samolyotlari turizm va parvozlar rivojiga xizmat qiladi.
Prezident Shavkat Mirziyoyevning Fransiyaga rasmiy tashrifi doirasida yirik aviatsiya loyihalari bo‘yicha muhim kelishuvlarga erishildi. Jumladan, Airbus kompaniyasidan 14 ta zamonaviy yo‘lovchi samolyoti xarid qilinadi, yana 5 tasi esa ijaraga olinadi. Shuningdek, AQShning Boeing kompaniyasi bilan 12 ta samolyotni O‘zbekistonga olib kelish bo‘yicha muzokaralar boshlangan.
Bu haqda Prezident matbuot kotibi Sherzod Asadov ma’lum qildi.
Davlat rahbari mutasaddi tashkilotlarga ushbu imkoniyatdan samarali foydalanishni, yo‘lovchilar oqimini hisoblab, yangi yo‘nalishlar va reyslar ochishni hamda sayyohlar oqimini oshirishga doir aniq reja ishlab chiqishni topshirdi.
Mazkur loyiha orqali O‘zbekistonning aviaparki sezilarli yangilanadi, bu esa ichki va xalqaro turizm hamda aviatashuvlar sifati va qulayligini yangi bosqichga olib chiqishi kutilmoqda.
