Oq uy BMT va NATOni moliyalashtirishni to‘xtatishni taklif qildi
Moliyalashtirish 2025 yil oktyabridan 50 foizga qisqartiriladi.
Donald Tramp maʼmuriyati AQSH Davlat departamenti byudjeti va tashqi siyosat xarajatlarini keskin qisqartirishni taklif qilmoqda. Reuters va Associated Press xabarlariga ko‘ra, AQSH Maʼmuriy-byujet boshqarmasi hujjatida BMT va NATO kabi xalqaro tashkilotlarga moliyaviy yordamni to‘xtatish rejalashtirilgan.
Moliyalashtirish 2025 yil oktyabridan 50 foizga, yaʼni taxminan 30 milliard dollarga kamaytirilishi ko‘zda tutilgan. Shuningdek, 10 ta elchixona va 17 ta konsullikni yopish, diplomatlar sonini qisqartirish va USAID funksiyalarini Davlat departamentiga o‘tkazish taklif etilgan. Qisqartirishlar asosan Afrika va Yevropadagi diplomatik vakolatxonalarga taʼsir qiladi.
Hujjat hali loyiha darajasida bo‘lib, Davlat departamenti va Kongress tomonidan maʼqullanmagan. Oq uy vakillarining taʼkidlashicha, moliyalashtirish bo‘yicha yakuniy qarorlar hali qabul qilinmagan. Xorijiy yordam dasturlari hamda sog‘liqni saqlash sohasidagi mablag‘lar ham qisqartiriladi, faqat OITS, sil va bezgakka qarshi kurashga oz miqdorda mablag‘ ajratish rejalashtirilgan.
