Tramp Ukrainaga qurol sotishni rad etdi
U hatto 50 milliardlik taklifni ham qabul qilmadi.
AQSh prezidenti Donald Tramp Ukrainaga hattoki pul evaziga ham qurol-yarog‘ yetkazib berishdan bosh tortdi. Ukraina Prezidenti Vladimir Zelenskiy AQShdan “Patriot” havo hujumidan mudofaa tizimlari va yuzlab raketalarni xarid qilish uchun 50 milliard dollar ajratishga tayyorligini bildirgan edi. Ammo Tramp bu taklifga salbiy javob berdi.
Tramp jurnalistlarga bergan intervyusida shunday dedi: “Zelenskiy doim raketa sotib olmoqchi. Ammo siz urush boshlayotgan bo‘lsangiz, uni yutishga qodir ekaningizga ishonishingiz kerak. Raqibingiz sizdan 20 barobar kuchli bo‘lsa, va siz faqat boshqalardan raketa kutayotgan bo‘lsangiz – bu noto‘g‘ri yondashuv”. Bu bayonotlar Trampning Rossiya bilan muzokaralarni afzal ko‘rishini yana bir bor ko‘rsatdi.
Ukrainada Trampning pozitsiyasi keskin norozilik bilan kutib olindi. Mamlakatdagi siyosiy faollar va xalqaro kuzatuvchilar bu qarorni qon to‘kilishini davom ettirishga imkon beruvchi omil deb hisoblamoqda. Tahlilchilar esa Trampning bu qarori uning saylovoldi kampaniyasi va izolyatsion siyosatga sodiqligini aks ettirayotganini ta’kidlashmoqda.
