Xitoy AQShdan suyultirilgan gaz importini to‘xtatdi
AQSh tomonidan LNG importiga 49 foizlik boj joriy etilgan.
Xitoy AQShdan suyultirilgan tabiiy gaz (LNG) importini butunlay to‘xtatdi. So‘nggi tanker 6-fevral kuni Texasdagi Korpus Kristi portidan Xitoyga yetib kelganidan buyon, 10 haftadan ko‘proq vaqt mobaynida yangi yetkazib berishlar amalga oshirilmagan. Mutaxassislar buni AQSh va Xitoy o‘rtasidagi savdo urushining energetika sohasiga ta’siri sifatida baholamoqda.
AQSh tomonidan LNG importiga 15 foizlik boj joriy etilganidan so‘ng, Xitoyga yo‘l olgan yana bir tanker yo‘nalishini o‘zgartirib, Bangladeshga gaz yetkazdi. Ayni paytda boj 49 foizga ko‘tarildi va bu Xitoy kompaniyalari uchun Amerika gazini iqtisodiy jihatdan foydasiz holga keltirdi. Natijada, Xitoy Rossiya bilan energetika hamkorligini mustahkamlashga harakat qilmoqda.
Kolumbiya universiteti eksperti Anne-Sofi Korbo bu to‘xtalish uzoq muddatli oqibatlarga olib kelishini, ammo Xitoy kompaniyalari kelajakda AQShdan gaz sotib olish ehtimolini butunlay rad etib bo‘lmasligini ta’kidladi. Shunga qaramay, Kpler tahlilchisi Gillian Bokkara yaqin orada savdoning tiklanish ehtimoli pastligini aytdi.
Hozirda Xitoy kompaniyalari AQSh terminallaridan LNG yetkazib berish bo‘yicha uzoq muddatli shartnomalarga ega bo‘lsa-da, ularning ayrimlari 2049 yilgacha amal qiladi. Biroq, inflyatsiya va yuqori bojlar sababli bu shartnomalar ham xavf ostida qolmoqda.
