Pentagonda uch amaldor ishdan bo‘shatildi
Muammo AQSH milliy xavfsizlik ma’lumotlarining ruxsatsiz tarqatilishi bilan boshlangan.
AQSH Mudofaa vazirligida (Pentagon) xizmat qilgan uch nafar yuqori lavozimli amaldor — Den Koldvell, Darin Selnik va Kolin Kerroll tuhmat ayblovlari ortidan lavozimidan ozod etildi.
Pentagon 15–16 aprel kunlari mazkur amaldorlarni ishdan bo‘shatdi. Ularning qo‘shma bayonotida aytilishicha, Pentagondagi ismi oshkor qilinmagan rasmiylar ular haqida yolg‘on ma’lumotlar tarqatgan. “Biz Vatanga sadoqat bilan xizmat qildik. Iroq va Afg‘onistondagi urushlarda qatnashganmiz, axborot xavfsizligini qadrlaymiz va uni har kuni himoya qilishga intilamiz”, — deyiladi bayonotda.
Ushbu mojaro Pentagon tomonidan mart oyida boshlangan “milliy xavfsizlik ma’lumotlarining ruxsatsiz oshkor etilishi” bo‘yicha tergov bilan bog‘liq. Tergov doirasida Ilon Maskning tashrifi, Qizil dengizdagi harbiy harakatlar va Ukraina bilan razvedka ma’lumotlari almashinuvi haqida sizib chiqqan ma’lumotlar ko‘rib chiqilmoqda. Shuningdek, jurnalist Jeffri Goldbergning Signal messenjeri orqali yopiq suhbatlarga noqonuniy kirgani ham muhokamada bo‘ldi.
