Xonanda Rayhon jarimaga tortildi
U mualliflik huquqini buzganlikda ayblandi.
Adliya vazirligi tomonidan o‘rganilgan holatga ko‘ra, mashhur xonanda Rayhon G‘aniyeva va “Sahar” guruhi solisti Anvar Jo‘rayev mualliflik huquqini buzganlikda ayblandi. Ma’lum bo‘lishicha, ular shoir Shoxrux Abduvohidovga (Abdussamiy taxallusi) tegishli “Yaxshimasmi” va “Erta bormizmi” nomli she’rlarni muallif ruxsatisiz qo‘shiqlarda ishlatgan.
Mazkur murojaat Mualliflik va turdosh huquqlarni himoya qilish jamoat birlashmasi tomonidan Adliya vazirligiga yuborilgan. Tekshiruv davomida she’rlar matni muallifning roziligisiz ijro etilgani aniqlangan.
Holat yuzasidan Ma’muriy javobgarlik to‘g‘risidagi kodeksning 177-1-moddasi asosida bayonnomalar tuzilib, tegishli sudga yuborilgan.
Toshkent shahri Yashnobod tuman sudi qaroriga ko‘ra, Rayhonga 750 ming so‘m (bazaviy hisoblash miqdorining 2 baravari) miqdorida jarima jazosi tayinlandi.
