“Qadimgi sivilizatsiyalarga sayohat”
Islom sivilizatsiyasi markazida immersiv shou tashkil etilmoqda.
O‘zbekistondagi Islom sivilizatsiyasi markazida ilmiy izlanishlar va madaniy-maʼrifiy loyihalar asosida yangi bosqich boshlanmoqda. “Qadimgi sivilizatsiyalarga sayohat” nomi ostida tashkil etilayotgan immersiv shou orqali qadim o‘tmish zamonaviy texnologiyalar yordamida tomoshabinlarga yangicha tarzda taqdim etiladi.
Loyiha doirasida Islomdan avvalgi davrga oid besh muhim sivilizatsiya — Xorazm, Baqtriya, Sug‘d, Choch va Farg‘ona madaniy meroslari chuqur ilmiy tadqiq etilmoqda. 1-bosqichda ushbu hududlarda mavjud bo‘lgan qadimiy shaharlar, yozuvlar, arxitektura, madaniyat va ijtimoiy hayotga oid tarixiy manbalar o‘rganilib, ularning raqamli texnologiyalar orqali jonlantirilishi ko‘zda tutilgan.
Bu haqida “Islomdan avvalgi davr sivilizatsiyalari” bo‘limi koordinatori, tarix fanlari doktori, professor Mirsodiq Isxoqov quyidagicha fikr bildirdi:
– Ushbu immersiv shou zamonaviy talqinda tarixni gavdalantirishi bilan eʼtiborga molikdir. Mahalliy va chet ellik sayyohlar muzeyga tashrif buyurar ekan, uning aynan zamonaviy tarzda tarixni yoritilishidan zavq olishsa ajab emas. immersiv shouning asosiy g‘oyasi – qadimiy tarixni raqamli makonda jonlantirish, uni nafaqat ko‘rish, balki his qilish imkonini berishdir. Tashrif buyuruvchilar o‘zini go‘yoki qadimgi Baqtriya saroyida yoki Sug‘d bozori ichida turgandek his qilishi mumkin. VR (virtual reallik), 3D modellashtirish, ovoz effektlari va interaktiv elementlar orqali yaratiladigan sahnalar ilmiy asoslangan holda ishlanmoqda. Bu nafaqat tarixni o‘rganish, balki uni his qilishdir. O‘zbekiston tarixining turli bosqichlarini har tomonlama yoritishga qaratilgan bu loyiha yurtimiz turizm salohiyatini oshirishga xizmat qiladi. Ayniqsa, xorijiy sayyohlar uchun bu yondashuv o‘ziga xos yangilik bo‘lib, tarixni zamonaviy estetikada ko‘rsatish orqali ularni chuqur taassurotga soladi.
