Sirdaryoda noqonuniy baliq ovlaganlar ushlandi

19–20 aprel kunlari Ekologiya, atrof-muhitni muhofaza qilish va iqlim o‘zgarishi vazirligi nazorat inspeksiyasi hamda Sirdaryo viloyati davlat ekologik inspektorlari hamkorligida Sirdaryo daryosida noqonuniy baliq ovlash holatlariga qarshi maxsus nazorat tadbirlari amalga oshirildi.

 

Ushbu tadbirlar aholining ko‘plab murojaatlari asosida, xususan, baliqlarning urug‘lanish (urchish) davrida brakonerlar tomonidan elektr qarmoq va noqonuniy to‘rlardan (leskali to‘rlar) foydalanish holatlarini bartaraf etish maqsadida tashkil etildi.

 

Tadbir davomida daryodan umumiy uzunligi 1000 metrga yaqin bo‘lgan, noqonuniy tarzda o‘rnatilgan 20 ga yaqin leskali to‘rlar yig‘ib olindi. Ushbu to‘rlar belgilangan tartibda yo‘q qilinadi. Shuningdek, elektr qarmoqdan foydalangan holda baliq ovlagan 2 nafar huquqbuzar qo‘lga olindi. Ulardan ashyoviy dalil sifatida 1 dona alyuminiy qayiq, motor, 2 dona akkumulyator, elektr qarmoq va tegishli ov qurollari, shuningdek, turli xildagi 21 dona baliq daliliy ashyo sifatida olib qo‘yildi.

 

Huquqbuzarlik natijasida tabiatga jami 368 million 437 ming 500 so‘m zarar yetkazilgan. Barcha hujjatlar huquqni muhofaza qiluvchi organlarga yuboriladi.

 

Ekologiya vazirligi yurtdoshlarimizni tabiiy zaxiralarni muhofaza qilishda faol ishtirok etishga, baliq ovlashda faqat belgilangan tartib-qoidalarga rioya qilishga chaqiradi.