Grenlandiya AQSh bilan hamkorlikka tayyor
Bosh vazir davlat mustaqilligiga hurmat bilan yondashilishini muhim deb biladi.
Grenlandiya bosh vaziri Jens-Frederik Nielsen orol AQSh bilan kuchli hamkorlik qilishga tayyor ekanini ma'lum qildi, deb xabar bermoqda Daniyaning TV2 telekanali.
"Biz kuchli hamkorlikka va kelgusida rivojlanishga tayyormiz, lekin biz hurmatni xohlaymiz," — dedi bosh vazir o'z bayonotida.
Nielsenning ta'kidlashicha, Grenlandiya hamkorlikni mustahkamlashni istaydi, biroq o'z mustaqilligi va qadriyatlariga hurmat bilan yondashilishini muhim deb biladi. Shuningdek, u orolning tabiiy boyliklari va strategik joylashuvi kelajakda ko'plab yangi imkoniyatlar yaratishini alohida ta'kidladi.
