Isroillik druzlar avtomagistralni to‘sib qo‘ydi
Ular Suriyadagi druzlarga qarshi hujumlarni to‘xtatishni so'ragan.
Isroilda druz jamoasi vakillari mamlakatdagi asosiy avtomagistrallarni to‘sib qo‘yib, hukumatdan Suriyadagi druzlarga qarshi hujumlarni to‘xtatish va ularni himoya qilishni talab qildi.
Mudofaa vaziri Israél Kats shunday dedi: “Men yana bir bor Suriya rejimi rahbari Ahmad ash-Sharaani ogohlantiraman: agar Suriyadagi druzlarga hujumlar to‘xtatilmasa, biz juda keskin javob beramiz. Kecha yuz bergan hujumlardan so‘ng, Bosh vazir Netanyaxu va men IDFga (Isroil armiyasi) ogohlantiruvchi zarbalar berish buyruqlarini berdik va Suriya rejimiga bu hujumlarni to‘xtatish mas’uliyati ularning zimmasida ekanini aniq bildirdik. Biz druzlarni himoya qilishga intilyapmiz va voqealarni diqqat bilan kuzatyapmiz.”
Al Jazeera’ning xabar berishicha, Isroil armiyasi Suriyaning janubida, Hermon tog‘i etagidagi Hadar nomli druz qishlog‘iga kirgan. Syria TV esa Isroil harbiylari qishloqqa kirish-chiqishni nazorat qilish uchun postlar o‘rnatib, barcha yo‘llarni yopganini bildirgan. Hatto ular Suriya hududiga chuqurroq kirib, Baksam druz qishlog‘i yaqinida ham nazorat postini o‘rnatgan.
Avvalroq Suriya hukumati kuchlari bilan druz jangchilari o‘rtasida to‘qnashuvlar boshlangan edi.
