Turkiyada kesarcha kesish taqiqlandi
Ayollar huquqlarini himoya qiluvchi tashkilotlar bu qarorga qarshi.
Turkiya hukumati tug‘ilishning pasayishiga qarshi kurashish uchun tibbiy ko‘rsatmasiz rejalashtirilgan kesarcha kesishni taqiqlashga qaror qildi. Bu qaror ayollar huquqlarini himoya qiluvchi tashkilotlar noroziligiga sabab bo‘lib, mamlakat bo‘ylab qizg‘in bahs-munozaralarni keltirib chiqardi.
19 aprel kuni e’lon qilingan farmonga ko‘ra, kichik xususiy klinikalarda endi tibbiy sabab bo‘lmasa, sezaryen operatsiyalari o‘tkazilmaydi. Bundan tashqari, o‘z operatsiya xonasiga ega bo‘lmagan klinikalarda tug‘ruq bo‘limlarini yaratish ham taqiqlanadi. Yangi qoidalar raqamli hujjatlashtirish va ma’lumotlar xavfsizligini ham o‘z ichiga oladi.
Turkiyada sezaryen juda keng tarqalgan. 2018 yilda bu ko‘rsatkich 51,9% bo‘lsa, 2022 yilda 57,2% ga yetgan. Prezident Erdo‘g‘an 2008 yildan beri ayollarni “kamida uchta bola” tug‘ishga chaqirib keladi, lekin so‘nggi yillarda tug‘ilish ko‘rsatkichi pasayib, har bir ayolga 1,5 bola darajasiga tushib qolgan.
Ayollar huquqlarini himoya qiluvchi tashkilotlar bu qarorni qattiq tanqid qilib, uni ayollarning tana avtonomiyasi va tanlash huquqiga hujum deb atashdi. “Ayollarni tug‘ishga majbur qilish va qanday ona bo‘lishlari kerakligini ko‘rsatishga urinish ularning huquqlarini buzadi,” deya ta’kidladi Turkiya xotin-qizlar uyushmalari federatsiyasi rahbari Canan Gullu.
