Parijda ko‘k rangdagi surat 18,4 mln yevroga sotildi
Bu Fransiyada suratlar uchun eng yuqori narx ekani aytilmoqda.
Parijdagi Christie‘s auksionida fransuz rassomi Iv Kleynning mashhur California nomli asari 18,4 million yevroga sotildi.
1961 yilda yaratilgan bu asar rassomning o‘ziga xos International Klein Blue (IKB) pigmenti yordamida ishlangan bo‘lib, u to‘liq monoxrom (bir rangli) ko‘rinishga ega. Asarning o‘lchami katta bo‘lib, yuzasida mayda toshcha elementlari ham mavjud — bu unga maxsus tekstura beradi.
Kleyn o‘z ijodida rangni mustaqil sanʼat vositasi sifatida talqin qilgan. U yaratgan “IKB” pigmenti chuqur ko‘k tusdagi noyob aralashma bo‘lib, rassom nomi bilan chambarchas bog‘liq.
Rassomning ushbu asari ilgari xususiy kolleksiyada saqlangan va 2005–2008 yillarda Nyu-Yorkdagi Metropoliten muzeyida vaqtincha namoyish etilgan.
