YI Ukrainaga 2 mlrd yevro mudofaa yordami ajratdi
Bu Rossiyaning muzlatilgan aktivlari hisobidan amalga oshirildi.
Yevropa Ittifoqi Ukrainaga Rossiyaning muzlatilgan aktivlaridan olinayotgan foyda hisobidan 2 milliard yevro mudofaa yordami ajratdi. Bu haqda "Deutsche Welle" nashri Bryusselda bo‘lib o‘tgan YI–Ukraina mudofaa forumida xabar berdi.
Forumda, shuningdek, Kievga qurol va o‘q-dorilar xaridi uchun qo‘shimcha 900 million yevro ajratilishi e’lon qilindi. YI tashqi siyosati rahbari Kaja Kallas Ukraina harbiy sanoati bilan 1 milliard yevroga teng shartnomalar imzolanganini ma’lum qilgan edi.
Yevropa Ittifoqi hozirgacha Ukraina mudofaa sanoatini qo‘llab-quvvatlash uchun 3,3 milliard yevro ajratgan. Bryusseldagi forumda YI va Ukraina o‘rtasida mudofaa sohasida qo‘shma maqsadli guruh tuzilgan bo‘lib, u Ukrainani ReArm Europe dasturi doirasida YI sanoat tizimiga integratsiya qilish ustida ishlaydi.
