Estoniya 400 mln yevroga hujumchi dronlar oladi
Dronlar havo hujumlariga javob berish funksiyasini bajaradi.
Estoniya hukumati kelgusi yetti yil davomida mudofaa salohiyatini mustahkamlash maqsadida 400 million yevro sarflab hujumchi uchuvchisiz dronlar xarid qilishni rejalashtirmoqda. Bu haqda mamlakat mudofaa rasmiylari ma’lum qildi.
Rejada bo‘lgan xaridlar Estoniyaning NATO doirasida o‘z xavfsizligini ta’minlashga qaratilgan sa’y-harakatlarining bir qismi sanaladi. Dronlar havo hujumlariga javob berish, razvedka olib borish va strategik nishonlarga zarba berish kabi funksiyalarni bajaradi.
Estoniya tomoni ayni damda qaysi turdagi yoki qaysi davlatdan uchuvchisiz dronlar olinishi bo‘yicha aniqlik kiritmagan. Biroq harbiy tahlilchilarga ko‘ra, bu kabi investitsiyalar Rossiya bilan geografik yaqinlikda joylashgan Boltiqbo‘yidagi davlatlar uchun xavfsizlik kafolati sifatida muhim ahamiyat kasb etadi.
