Tramp Putin bilan 2 soat suhbatlashdi
Tomonlar 9 nafardan mahbusni almashishga kelishib oldi.
Rossiya prezidenti yordamchisi Yuriy Ushakovning ma’lum qilishicha, Vladimir Putin va AQSh prezidenti Donald Tramp o‘rtasida 2 soat 5 daqiqa davom etgan telefon suhbati ochiq va konstruktiv ruhda, o‘zaro hurmat asosida kechdi. Muloqot chog‘ida tomonlar Rossiya va AQSh o‘rtasidagi mahbuslar almashinuvi masalasini muhokama qilib, har ikki davlatdan 9 nafardan mahbusni topshirishga kelishib oldi.
Ikki yetakchi Moskva va Vashington o‘rtasidagi hozirgi munosabatlar holatini tahlil qilib, ularni kelgusida normallashtirish zarurligini ta’kidladi. Tramp Rossiyani AQShning eng muhim hamkorlaridan biri sifatida ko‘rayotganini bildirgan. Shuningdek, ular Ukraina bo‘yicha ham muloqotni davom ettirishga kelishib olgan.
Putin va Tramp shaxsan uchrashish ehtimolini istisno etmadi, ammo uchrashuv joyi va sanasi hali belgilanmagan. Ushakovning aytishicha, Rossiya va Ukraina o‘rtasida o‘t ochishni to‘xtatish bo‘yicha aniq kelishuv muddati muhokama qilinmagan. Suhbat davomida Tramp mojarolar yakunlangach, Rossiyaga tashrif buyurishini ma’lum qilgan.
