YI Ukraina eksportiga boj to'lovlarini tiklaydi
Hozirda savdo kelishuvi bo‘yicha muzokaralar davom etmoqda.
Yevropa Ittifoqi (YI) 2022-yilda Rossiyaning Ukrainaga bostirib kirishidan so‘ng Ukraina eksportiga boj va kvotalarni vaqtincha bekor qilgan edi. Bu choralar 2024-yil 6-iyun kuni yana bir yilga uzaytirildi va 2025-yil 5-iyungacha amal qiladi.
Biroq, YI ichki bozorini himoya qilish maqsadida ayrim qishloq xo‘jaligi mahsulotlari, jumladan, tuxum, shakar, makkajo‘xori, asal va parranda go‘shti uchun avtomatik cheklov mexanizmi joriy etildi. Agar bu mahsulotlar importi 2022–2023-yillardagi o‘rtacha hajmdan oshsa, bojlar qayta tiklanadi.
Ukraina Moliya vaziri Serhiy Marchenko bu cheklovlar mamlakat iqtisodiyotiga jiddiy zarar yetkazishini aytib, YI tomonidan bojlarning qayta joriy etilishi salbiy signal bo‘lishini ta’kidladi.
Ayni paytda YI va Ukraina o‘rtasida uzoq muddatli savdo kelishuvi bo‘yicha muzokaralar davom etmoqda. Agar yangi kelishuvga erishilmasa, 2025-yil 6-iyundan boshlab 2014-yildagi Assotsiatsiya bitimi shartlariga qaytilishi mumkin.
