AQSh Rossiyaga nisbatan yangi sanksiyalarni rejalashtirmoqda
Tramp Ukraina bo‘yicha muzokaralarni to‘xtatishi mumkin.
AQSh prezidenti Donald Tramp Ukraina bo‘yicha keskin choralar ko‘rishni rejalashtirmoqda. "Wall Street Journal" nashrining xabariga ko‘ra, u Moskvaning hujumlaridan norozi bo‘lib, Rossiyaga qarshi yangi sanksiyalarni joriy etishni ko‘rib chiqmoqda.
Manbalarga ko‘ra, kutilayotgan sanksiyalar moliyaviy cheklovlarni o‘z ichiga olmasligi mumkin, ammo Vladimir Putinni muzokara stoliga qaytarish uchun bosim kuchaytiriladi. Xususan, Rossiyadan 30 kunlik o‘t ochishni to‘xtatish talabi ilgari surilishi kutilmoqda.
Tramp avvalroq Ukraina hududiga uyushtirilgan keng ko‘lamli hujumlardan so‘ng Rossiyaga qarshi sanksiyalar haqida gapirgan edi. Keyinchalik u Putinni keskin tanqid qilib, uni "butunlay aqldan ozgan" deb atadi.
Prezidentning matbuot kotibi Kerolayn Livittning so‘zlariga ko‘ra, Tramp mojaroni diplomatik yo‘l bilan hal qilish tarafdori, biroq urinishlar samara bermasa, AQSh muzokaralardan chiqish masalasini ko‘rib chiqadi.
"The New York Times" manbalariga tayanib, Tramp Yevropa yetakchilariga Rossiyaga nisbatan bosimni kuchaytirish niyati yo‘qligini bildirgani haqida ham xabar bergan.
