Eron ilk havo taksisini ishga tushirdi

Eron o‘z tarixida ilk bor havo taksisi xizmatini rasman ishga tushirdi. Bu loyiha mamlakat aviatsiya sanoati va transport infratuzilmasini rivojlantirish yo‘lida muhim strategik qadamlardan biri sifatida baholanmoqda.

 

Yangi xizmatning tantanali taqdimoti Horremshehr shahrining Eron-Iroq urushi davridagi ozodlik yilligiga bag‘ishlangan tadbirlar doirasida bo‘lib o‘tdi. Eron prezidenti ham videomurojaat orqali ushbu tashabbusning davlat miqyosidagi ahamiyatini alohida ta’kidladi.

 

Ilk havo taksisi mamlakatning shimoli-g‘arbida joylashgan Kerez va Qazvin shaharlarini bog‘laydi. Loyiha aloqa va axborot texnologiyalari vazirligi boshchiligida amalga oshirilgan bo‘lib, Payam xalqaro aeroporti va Payam maxsus iqtisodiy zonasi tomonidan qo‘llab-quvvatlangan.

 

Payam aeroporti bosh direktori Mohsen Hasanlu ushbu xizmatni “transportda yangi bosqich” deb atab, bu tashabbus mintaqaviy aviatsiyani jonlantirish, yangi investitsiyalarni jalb qilish va aholi uchun yanada qulay havo yo‘llarini yaratish yo‘lida muhim yutuq ekanini aytdi.

 

“Havo taksisi yuklamasi kam bo‘lgan havo yo‘nalishlarini faollashtirib, yangi transport ekotizimini shakllantiradi. Bu esa iqtisodiyotni diversifikatsiya qilish va Alborz viloyatini jadal rivojlantirishga xizmat qiladi”, — dedi Hasanlu.

 

Loyiha Eron transport tizimini zamonaviylashtirish va innovatsion yechimlar orqali iqtisodiy o‘sishga turtki berish rejasining bir qismidir.