Germaniya NATOni Rossiya tahdidiga tayyorgarlikka chaqirdi
NATO 2029-yilgacha urushga tayyorlanishi kerak.
Germaniya Qurolli kuchlari bosh inspektori Karsten Broyer NATO davlatlarini 2029-yilgacha Rossiya bilan ehtimoliy qurolli to‘qnashuvga jiddiy tayyorgarlik ko‘rishga chaqirdi.
General Broyerning aytishicha, Rossiya 2024-yilda 4 million dona 152 mm artilleriya snaryadi ishlab chiqargan. Ularning barchasi hozircha Ukraina urushida ishlatilmayapti, bu esa Rossiyaning kengroq harbiy rejalarini ko‘rsatadi.
Shuningdek, Rossiya har yili 1500 dona asosiy jangovar tank ishlab chiqarayotgani ta’kidlandi. Broyer bu texnikalar ehtimoliy ravishda Boltiqbo‘yi NATO davlatlariga qarshi qo‘llanilishi mumkinligini istisno qilmaydi: “Har bir tankni Ukrainaga yuborishmaydi. Ular Rossiya omborlarida, G‘arbga qarshi yangi harbiy tuzilmalar tarkibida saqlanadi”, — dedi u.
Uning so‘zlariga ko‘ra, NATO so‘nggi 40 yil ichida kuzatilmagan darajadagi harbiy tahdid bilan yuzma-yuz turibdi va bu xavfga qarshi harakat qilish kechiktirib bo‘lmaydigan masalaga aylangan.
Bu bayonot Yevropada harbiy xavfsizlik bo‘yicha tashvishlarning oshib borayotganini ko‘rsatadi. Germaniya rasmiylari ushbu ogohlantirish orqali Yevropa Ittifoqi va NATO ichida harbiy byudjetlarni ko‘paytirish va mudofaa strategiyalarini yangilash zaruriyatiga urg‘u bermoqda. Rossiyaning uzoq muddatli harbiy salohiyati esa hozircha faqat Ukrainaga qaratilgan emas, balki kengroq strategik maqsadlarga xizmat qilayotgandek ko‘rinmoqda.
