O‘zbekistonda 64 ming xonadonga quyosh panellari o‘rnatildi
Ushbu panellar yiliga 313 million kVt/soat elektr energiyasi ishlab chiqaradi.
O‘zbekiston bo‘ylab 64 mingdan ortiq xonadonda umumiy quvvati 223,4 Mvt/soat bo‘lgan quyosh panellari o‘rnatildi. Ushbu panellar yiliga 313 million kVt/soat elektr energiyasi ishlab chiqarib, natijada 104 million kub metr tabiiy gaz tejalmoqda.
2024-yilning may-dekabr oylarida elektr energiyasi iste’moli o‘tgan yilga nisbatan 10,6% ga kamaydi, bu esa 1,3 milliard kVt/soat energiya tejalishini ta’minladi. Ayniqsa, oyiga 10 ming kVt/soatdan ortiq energiya sarflagan xonadonlar soni 80 mingdan 15 mingtaga tushdi.
LED-yoritish uskunalarini o‘rnatish eng keng tarqalgan energiya tejamkor amaliyotga aylandi — xonadonlarning 87%i ushbu tizimga o‘tgan. Qoraqalpog‘iston, Xorazm, Navoiy va Toshkent viloyatlarida bu ko‘rsatkich 90%dan oshgan. Shu bilan birga, 44% xonadonlar plastik eshik va derazalar bilan issiqlikni tejashga e’tibor qaratgan.
