Ukraina Rossiya aerodromlariga ommaviy hujum uyushtirdi
Rossiyaga umumiy 7 milliard dollarlik zarar yetkazilgan.
Ukraina Xavfsizlik xizmati (SBU) manbalariga ko‘ra, yakshanba kuni Ukraina tomonidan Rossiyaning bir nechta harbiy aviabazalariga keng ko‘lamli dron hujumlari uyushtirildi. Noma’lum manba hujum natijasida Rossiyaning kamida 40 ta harbiy samolyoti, jumladan A-50, Tu-95 va Tu-22M3 rusumidagi samolyotlarga zarar yetganini bildirgan. Hozircha bu ma’lumotlar mustaqil manbalar tomonidan tasdiqlanmagan.
SBU hujumni “O‘rgimchak to‘ri” deb nomlangan maxsus operatsiya doirasida amalga oshirgan bo‘lib, unga xizmat rahbari Vasiliy Malyuk boshchilik qilgani aytilmoqda.
Hujum qilingan aerodromlar:
Dyagilevo (Ryazan viloyati)
Olenya (Murmansk viloyati)
Belaya (Irkutsk viloyati)
Ivanovo (Ivanovo viloyati)
OAVda tarqalgan videolarga ko‘ra, dronlar Olenegorsk yaqinidagi yuk mashinasidan uchirilgan. Baza Telegram-kanalining yozishicha, ushbu yuk mashinasi haydovchisi voqea joyida o‘lik holda topilgan.
SBU ma’lumotlariga ko‘ra, ushbu hujumlar natijasida Rossiyaning strategik qanotli raketa tashuvchi samolyotlarining 34 foiziga zarar yetkazilgan. Moskvaga yetkazilgan zararning umumiy bahosi 7 milliard dollarni tashkil qilishi mumkin.
Rossiya Mudofaa vazirligi Ukraina tomonidan uyushtirilgan hujumda bir nechta samolyot yonganini tasdiqladi, biroq zararning to‘liq hajmini ochiqlamadi.
Ukraina Xavfsizlik xizmati “O‘rgimchak to‘ri” operatsiyasi haqida batafsil ma’lumotni keyinroq e’lon qilishini bildirdi.
