Amirsoy hududidagi restoran yonib ketdi
Yong‘inning sababi aniqlanmoqda.
10 iyun kuni tongda Toshkent viloyati, Bo‘stonliq tumanida joylashgan yog‘och konstruksiyali restoranda yong‘in yuz berdi. Favqulodda vaziyatlar vazirligiga soat 01:32 da xabar tushgan.
Hodisaga 5 ta yong‘in-qutqaruv ekipaji jalb etilgan. Ular soat 02:01 da voqea joyiga yetib borib, yong‘inni soat 02:13 da o‘rab olishgan va 04:20 da to‘liq bartaraf etilgan.
Yong‘in natijasida restoran binosining taxminan 300 kvadrat metr maydoni — tomi, shiftlari, ichki qismlari va jihozlari yonib ketgan.
Hodisa oqibatida tan jarohati olganlar haqida ma’lumot yo‘q. Yong‘inning sababi va yetkazilgan zarar miqdori aniqlanmoqda.
