Xitoy Eronga yordam ko‘rsatmoqda

 

Isroilning Eronga qarshi harbiy operatsiyasi boshlanganidan so‘ng, Xitoydan Tehronga kamida uchta yuk samolyoti yuborilgan.

 

Birinchi samolyot 14-iyun kuni Xitoyning shimolidan havoga ko‘tarilgan. Qolgan ikki bort esa keyingi ikki kun ichida Xitoydan uchib chiqib, Qozog‘iston, O‘zbekiston va Turkmaniston orqali Eron tomonga yo‘l olgan. Biroq ular Eron havo hududiga yaqinlashganda radar ekranlaridan g‘oyib bo‘lgan. Parvozlar Boeing 747 rusumidagi yuk samolyotlarida amalga oshirilgan — bu turdagi bortlar odatda harbiy texnika yoki strategik yuklar tashishda ishlatiladi.

 

Garchi samolyotlar hujjatda Lyuksemburgga yo‘naltirilgan sifatida ko‘rsatilgan bo‘lsa-da, mutaxassislar ularning Yevropaga uchib bormaganini ta’kidlamoqda.

 

Ekspertlarning fikricha, bu tashuvlar oddiy yuk operatsiyasi bo‘lishi ehtimoliga qaramay, Xitoy va Eron o‘rtasidagi strategik aloqalar fonida juda katta e’tibor va savollar uyg‘otmoqda. Exeter universiteti olimi Andrea Giselli bunday yordam Eron rejimining qulashining oldini olish uchun qilingan bo‘lishi mumkinligini bildirdi.

 

“Eron rejimining beqarorligi Xitoyning mintaqadagi iqtisodiy va energetik manfaatlariga jiddiy zarar yetkazishi mumkin”, — dedi Giselli.

 

Eron — Xitoy uchun neftning muhim yetkazib beruvchisi (kuniga 2 million barrelgacha). Shu sababli, Pekinning bu mojaro fonida Tehronni qo‘llab-quvvatlashi strategik jihatdan ahamiyatli hisoblanadi.

 

Xitoy rasmiysi esa BMT Xavfsizlik Kengashidagi favqulodda yig‘ilishda Isroilni harbiy harakatlarni to‘xtatishga chaqirdi va: “Bu mintaqada hech kimga yangi yong‘in kerak emas,” — deya ogohlantirdi.