Toshkentda kadastr va gaz muammolaridan charchagan odamlar “Star House” rahbarini kaltakladi
Hodisa yuzasidan surishtiruv ishlari olib borilmoqda.
Ijtimoiy tarmoqlarda Chilonzor tumanida fuqaro va qurilish tashkiloti vakillari o‘rtasida yuz bergan janjal aks etgan video keng muhokamalarga sabab bo‘ldi.
Mazkur holat joriy yilning 13-iyun kuni soat 20:50 larda Chilonzor tumani, Kichik halqa yo‘li ko‘chasida joylashgan “STAR HOUSE” MCHJ ofisida sodir bo‘lgan. Aniqlanishicha, qurilish kompaniyasi rahbari, 1973-yilda tug‘ilgan B.M. hamda jamiyat tomonidan qurilgan ko‘p qavatli uydan xonadon sotib olgan bir guruh fuqarolar o‘rtasida bahs kelib chiqqan.
Fuqarolar uyning kadastr hujjatlari rasmiylashtirilmagani hamda gaz ta’minoti ulanmagani sababli norozi bo‘lib, mas’ullarga e’tiroz bildirgan. Mojaro davomida MCHJ rahbari B.M. “bosh miya yopiq jarohati, miya chayqalishi” tashxisi bilan, 1987-yilda tug‘ilgan fuqaro O.U. esa “qorin sohasida og‘riq” bilan tibbiyot muassasasiga murojaat qilgan.
Hozirda holat yuzasidan Chilonzor tumani IIO FMB tomonidan tergovga qadar tekshiruv ishlari olib borilmoqda. Tekshiruv yakunida qonunchilikka muvofiq qaror qabul qilinishi ta’minlanadi.
