Eron fuqarolari uchun O‘zbekistonga vizasiz kirish rejimi muhokama qilinmoqda

 

Eron fuqarolarining O‘zbekistonga vizasiz kirishi masalasi ko‘rib chiqilmoqda. Bu haqda Eronning O‘zbekistondagi elchixonasi vakili ma’lum qildi.

 

Unga ko‘ra, ayni paytda O‘zbekiston fuqarolari Eronga yiliga ikki marta, har safar ikki haftadan vizasiz sayohat qilishi mumkin. Mazkur tartib joriy etilgach, Eronga borayotgan o‘zbekistonliklar soni keskin oshgani aytilmoqda. Jumladan, Tehron–Toshkent yo‘nalishidagi aviachipta sotuvida yuqori talab kuzatilmoqda — haftasiga ikki marta parvoz amalga oshirilayotgan bo‘lsa-da, chipta topish qiyinlashgan.

 

Elchixonaning muvaqqat ishlar vakili Husayn Parvaresh ma'lumotiga ko‘ra, bu borish-kelishlar faqat turizm emas, balki tadbirkorlik sohasida ham faollashgan.

 

Shuningdek, tibbiy turizm yo‘nalishidagi hamkorlik masalalari ham muhokama qilinmoqda. O‘zbekistonlik bemorlar uchun Erondagi klinikalarda davolanish imkoniyatlarini kengaytirish ustida ish olib borilmoqda.

 

Eron tomoni O‘zbekiston fuqarolari uchun vizasiz tartibni bir tomonlama joriy etgan bo‘lsa, hozirda ikki tomonlama asosda — Eron fuqarolari uchun ham O‘zbekistonga vizasiz kirish imkoniyatini yaratish bo‘yicha muzokaralar davom etmoqda. Bu borada O‘zbekiston Tashqi ishlar vazirligi va boshqa mas’ul tuzilmalar bilan maslahatlashuvlar olib borilayotgani aytildi.

 

Ma’lumot uchun, 2019-yildan boshlab Eron fuqarolari O‘zbekistonga elektron viza asosida kirish imkoniga ega bo‘lgan.