Kembrij olimlari irsiy kasalliklarga qarshi sun’iy DNK yaratmoqda
Bu sun’iy hujayralar yordamida, zararlangan jigar yoki immun tizimi kabi muhim organlar sog‘lom to‘qima bilan tiklanishi mumkin.
Buyuk Britaniyada ilk bor inson DNKsining sun’iy nusxasini yaratishga qaratilgan rasmiy ilmiy loyiha yo‘lga qo‘yildi. Loyihani dunyodagi eng yirik tibbiy-biologik fondlardan biri — Wellcome Trust moliyalashtirmoqda. Tashkilot ushbu maqsad uchun 10 million funt sterling ajratgan.
Avvalroq bunday loyihalarga ruxsat berilmagan edi — sababi, inson genomi ustida sun’iy manipulyatsiyalar “genetik dasturlangan” odamlar paydo bo‘lishi xavfi bilan bog‘liq deb qaralgan. Shunga qaramay, bugungi kunda loyiha rasmiy bosqichga o‘tdi.
Tadqiqotchilarning ta’kidlashicha, loyiha gumanitar va tibbiy yo‘nalishga ega bo‘lib, og‘ir irsiy kasalliklarning oldini olish va davolash imkoniyatlarini kengaytirishni maqsad qiladi.
Loyihada ishtirok etayotgan Kembrij universiteti olimi Julian Seylning aytishicha, mutaxassislar kasalliklarga bardoshli sun’iy hujayralar yaratish ustida ishlamoqda. Bu hujayralar orqali, masalan, jigar yoki immun tizimi kabi hayotiy organlar zararlanganda ularni sog‘lom to‘qimalar bilan almashtirish mumkin bo‘ladi.
Bu ilmiy tashabbus sintetik biologiya sohasida Buyuk Britaniyaning yetakchi rolini mustahkamlashi, shuningdek, kelajakda regenerativ tibbiyotda inqilobiy o‘zgarishlarga olib kelishi kutilmoqda.
