Tramp Kanada bilan savdo muzokaralarini to‘xtatdi
Yaqin 7 kun ichida AQSH yangi tarif stavkalarini e’lon qiladi.
AQSH prezidenti Donald Tramp juma kuni Kanada bilan savdo muzokaralarini darhol to‘xtatganini e’lon qildi. U bu qarorni Kanadaning raqamli xizmatlarga soliq (DST) joriy qilgani bilan izohlab, bu soliqni “AQSHga ochiq hujum” deb atadi. Bu haqda CNN xabar berdi.
Trampning aytishicha, Kanada bilan barcha savdo muzokaralari tugatildi va yaqin 7 kun ichida AQSH yangi tarif stavkalarini e’lon qiladi. Kanada hukumati esa muzokaralarni davom ettirish niyatida ekanini bildirdi. Bosh vazir Mark Karni: “Bu murakkab muzokaralar, biz kanadaliklar manfaatini himoya qilishda davom etamiz,” — dedi.
DST ayniqsa AQSHning yirik texnologik kompaniyalariga, jumladan Meta, Google, Apple va Amazon’ga salbiy ta’sir qilmoqda. Tramp ma’muriyati Kanadaga nisbatan keng qamrovli tariflar joriy etilishi mumkinligini aytmoqda, bu esa javob choralarini keltirib chiqarishi mumkin.
Kanada ishbilarmon doiralari hukumatni soliqni bekor qilishga chaqirmoqda. Kanada Savdo palatasi va Biznes kengashi, AQSH bilan savdo aloqalarining yomonlashuvi iqtisodiy xavf tug‘dirishini aytib, DST’ni darhol bekor qilish tarafdori ekanini bildirdi.
