Surxondaryoda suv bosimi ortishi natijasida yirik hajmli quvur yorildi
Viloyat hokimligi Surxondaryodagi quvur yorilishi yuzasidan bayonot berdi.
Ijtimoiy tarmoqlarda Surxondaryo viloyatida yirik hajmli suv quvuri yorilib ketgani, buning oqibatida aholi xonadonlariga zarar yetgani haqida xabarlar va videolar tarqaldi. Viloyat hokimligi hodisa yuzasidan rasmiy bayonot berdi.
Ma’lum qilinishicha, hodisa 30-iyun kuni soat 12:50 lar atrofida Jarqo‘rg‘on tumanida joylashgan “Bobotog‘” nasos stansiyasining 1-kollektori 7-uchastkasida yuzaga kelgan. D-2850 mm diametrli quvurda yorilish sodir bo‘lgan va natijada yuqori bosim ostidagi suv tashqariga otilib chiqqan.
Avariya aniqlangach, zudlik bilan dastlabki xavfsizlik choralari ko‘rilgan: 1-kollektorga ulangan 3 ta nasos agregati tezkorlik bilan to‘xtatilgan. Shundan so‘ng maxsus brigadalar voqea joyiga yetkazilib, ta’mirlash ishlari olib borilgan. Soat 21:00 ga kelib ta’mirlash to‘liq yakunlangan, 21:20 da esa nasos agregatlari yana ishga tushirilgan.
Hokimlikning ta’kidlashicha, hodisa natijasida aholi xonadonlariga ham, nasos stansiyasi inshootlariga ham hech qanday zarar yetmagan. Ayni paytda barcha agregatlar odatdagi ish rejimida faoliyat yuritmoqda.
