Keyingi urush Turkiya va Isroil o‘rtasida bo‘lishi mumkin
Yaqin Sharqda yangi geosiyosiy qarama-qarshilik kuchaymoqda.
Yaqin Sharqda Turkiya va Isroil o‘rtasida yangi ziddiyat yuzaga kelishi ehtimoli ortmoqda. Bu haqda Financial Times gazetasi o‘zining tahliliy maqolasida ta'kidlagan. Nashrga ko‘ra, mintaqadagi kuchlar muvozanati tobora beqaror bo‘lib, ikki mamlakat o‘rtasidagi taranglik ochiq qarama-qarshilikka aylanishi mumkin.
Turkiya Tashqi ishlar vaziri Hakan Fidan IHT yig‘ilishida keskin bayonot berdi. “Falastin, Livan, Eron yoki Yaman muammosi yo‘q, lekin Isroil muammosi bor”, — degan Fidan. Prezident Erdo‘g‘onning yaqinlari esa Isroil Turkiyani “strategik jihatdan o‘rab olgan”ini da’vo qilmoqda. Isroilda esa Turkiya ta’siri hatto Eronnikidan ham xavfliroq deb baholanmoqda.
Suriya hozirda asosiy to‘qnashuv maydoniga aylangan. Turkiya Suriyaning shimolini nazorat qilayotgan bo‘lsa, Isroil janubdagi bufer zonani egallab, kurdlar va druz guruhlarini qo‘llab-quvvatlamoqda. Aprel oyida ikki tomon o‘rtasida deyarli to‘g‘ridan-to‘g‘ri harbiy to‘qnashuv yuz bergani ham qayd etilgan.
AQSh mintaqadagi keskinlikni yumshatishga urinmoqda, ammo bu oson bo‘lmaydi. Vashington ittifoqchilari bo‘lgan ikki davlat o‘rtasidagi ziddiyatni nazorat ostida ushlab turishga harakat qilmoqda. Biroq mutaxassislar nazarida, mavjud geosiyosiy muhitda bu diplomatik muvozanat har qanday vaqtda izdan chiqishi mumkin.
