O‘zbekiston fuqarolari uchun Kanada, Argentina va Avstraliya vizasini olish osonlashadi
Diplomatik vakolatxonasi yo‘q davlatlarga vizalar endi mamlakat ichida rasmiylashtirilishi mumkin.
Tashqi ishlar vazirligida “VFS Global” xalqaro kompaniyasining MDH va Sharqiy Yevropa mamlakatlari bo‘yicha mintaqaviy direktori Sh. Mishra hamda O‘zbekistondagi vakolatxonasi rahbari T. To‘ychiev bilan uchrashuv bo‘lib o‘tdi. Muzokaralarda O‘zbekiston hududida “VFS Global” vakolatxonalari tarmog‘ini kengaytirish istiqbollari muhokama qilindi.
Uchrashuv davomida kompaniya xodimlarining sayyor qabullarini tashkil etish, xususan, jamoaviy guruhlar tomonidan topshirilgan arizalarni joylarda ko‘rib chiqish amaliyotini joriy etish bo‘yicha kelishuvga erishildi. Mazkur xizmat pullik asosda ko‘rsatiladi va chekka hududlarda yashovchi fuqarolarga Toshkent yoki Samarqanddagi vizalar markaziga bormasdan yordam olish imkonini beradi.
Shuningdek, O‘zbekiston fuqarolari uchun diplomatik vakolatxonasi mavjud bo‘lmagan mamlakatlarga, jumladan Kanada, Argentina va Avstraliya kabi davlatlarga vizalarni rasmiylashtirish tartib-taomillarini soddalashtirish masalasi alohida muhokama qilindi.
Hozirgi kunda bunday davlatlarga viza olish ortiqcha vaqt va moliyaviy xarajatlarni talab qiladi. Shu bois O‘zbekiston tomoni jarayonlarning bir qismini mamlakat ichkarisida amalga oshirish, xususan “VFS Global”ning mahalliy ofislari orqali biometriya topshirish va onlayn suhbat o‘tkazish imkoniyatlarini joriy etish taklifini ilgari surdi.
Tomonlar viza xizmatlari sifati va qulayligini oshirish, yangi tashabbuslarni amalga oshirish hamda hamkorlikni kengaytirishdan manfaatdor ekanliklarini bildirdilar.
