Toshkentdagi jarima maydonchalarida mashinalar to‘lib ketdimi?

Ijtimoiy tarmoqda Toshkent shahrida YHXB keng ko‘lamli reydlar o‘tkazib, ko‘plab mashinalarni jarima maydonchasiga joylashtirgani, haydovchilar esa jarimani to‘lab, mashinalarini qaytarib ololmayotgani haqida xabarlar tarqaldi. Yaʼni haydovchilar jarimalarni to‘lashlari uchun kassa va onlayn bazalar ishlamayotganidan norozilik bildirishgan.

 

Holat keng muhokamalarga sabab bo‘lgach, Zamon.uz aniqlik kiritish uchun Yashnobod tumanidagi jarima maydonchasiga va xalq tilida “O‘zBUM” deya ataluvchi to‘lovlar amalga oshiriladigan maʼmuriy amaliyot bo‘limiga bordi.

 

Mazkur bo‘lim masʼullarining izoh berishicha, kuni kecha yuzaga kelgan shov-shuvli holatga elektr taʼminotida uzilish ortidan bazaning vaqtincha ishlamay qolgani sabab bo‘lgan. Uning faoliyati qayta tiklanguncha 5-6 soatlab vaqt ketgan.

 

“Hozirda baza ishlamoqda, to‘lovlarni amalga oshirgan fuqarolar mashinasini jarima maydonchalaridan olib chiqib ketmoqda”, - deydi to‘lov amaliyoti bo‘limidagi masʼul xodim.

 

“Birinchi marta mashinam jarima maydonchasiga tushdi. Hozir baza ishlayapti ekan, to‘lovni qilib mashinamni olib chiqib ketaman” deydi yosh haydovchilardan biri.

 

“3 kun oldin jarima maydonchasiga mashinam olib kirib qo‘yilgandi. Bugun to‘lov qilib, uni olib chiqib ketaman. Pul bo‘lsa, muammo yo‘q. To‘lov qilinyapti”, deydi to‘lov uchun navbatda turganlardan biri.

 

Shundan so‘ng Zamon.uz mashinalarni olib chiqib ketib bo‘lmayotgani aytilgan jarima maydonchasiga borib, u yerdagi vaziyatni ham o‘rgandi.

 

“Har kuni 10 dan ortiq mashina olib chiqib ketilyapti. Bugun ham kunning yarmiga 5-6 ta mashina chiqdi”, deydi jarima maydonchasida ishlovchi qorovul.

 

Zamon.uz aholi duch kelayotgan muammolar va yechimini kutayotgan masalalarni o‘rganishda davom etadi.