O‘zbekiston Xalqaro kimyo olimpiadasida tarixiy g‘alabaga erishdi
2 ta oltin va 2 ta kumush medalni qo‘lga kiritgan jamoa Toshkent xalqaro aeroportida tantanali kutib olindi.
Dubayda bo‘lib o‘tgan 57-Xalqaro Kimyo Olimpiadasida O‘zbekiston jamoasi rekord natijaga erishdi. Jamoa a’zolari 2 ta oltin va 2 ta kumush medalni qo‘lga kiritib, mamlakat tarixidagi eng yaxshi natijani qayd etdi.
Oltin medallarni Abu Ali ibn Sino nomidagi ixtisoslashtirilgan maktab o‘quvchilari Daler Rahimov va Mirjahon Muxammadov qo‘lga kiritdi. Kumush medallar esa Toshkent viloyatining Olmaliq shahridagi Buxoro maktabi o‘quvchisi Ibrohim Temurov hamda Abu Ali ibn Sino nomidagi maktabdan Biloliddin Zuxriddinovga nasib etdi.
Olimpiadada muvaffaqiyatga erishgan o‘quvchilar Islom Karimov nomidagi Toshkent xalqaro aeroportida tantanali kutib olindi. Bu g‘alaba O‘zbekistonning xalqaro fan olimpiadalaridagi yuksalib borayotgan salohiyatini yana bir bor ko‘rsatdi.
Yopilish marosimida 58-Xalqaro Kimyo Olimpiadasi bayrog‘i ramziy tarzda O‘zbekistonga topshirildi. Navbatdagi olimpiada 2026-yilda O‘zbekiston mezbonligida o‘tkaziladi.
