Qirg‘iziston O‘zbekiston va Tojikiston bilan chegara bo‘yicha uch tomonlama bitimni ratifikatsiya qildi
Mazkur qonun Jogorku Kenesh tomonidan 25-iyun kuni qabul qilingan va xalqaro shartnomalar bo‘yicha ichki huquqiy tartibga muvofiq amalga oshirilmoqda.
Qirg‘iziston Respublikasi Prezidenti Sadir Japarov Qirg‘iziston, O‘zbekiston va Tojikiston o‘rtasidagi chegara masalasiga doir muhim hujjatni rasman tasdiqladi. Bu haqda “Kabar.kg” nashri xabar berdi.
Ma’lum qilinishicha, davlat rahbari 2025-yil 31-mart kuni Tojikistonning Xo‘jand shahrida imzolangan “Uch davlatning davlat chegaralarini tutashtirish to‘g‘risidagi bitim”ni ratifikatsiya qilish haqidagi qonunni imzolagan.
Mazkur qonun 2025-yil 25-iyun kuni Qirg‘iziston parlamenti — Jogorku Kenesh tomonidan qabul qilingan. Hujjat Qirg‘izistonning xalqaro shartnomalar va parlament tartib-qoidalariga oid qonunlariga muvofiq ichki huquqiy jarayonlarni amalga oshirishga xizmat qiladi.
Shu bilan Qirg‘iziston rasmiy ravishda O‘zbekiston va Tojikiston bilan chegara tutashuvini belgilovchi uch tomonlama bitimni tasdiqladi. Ushbu bitim mintaqaviy barqarorlik va hamkorlikni mustahkamlash yo‘lida muhim huquqiy asoslardan biri sifatida baholanmoqda.
