Netanyaxu yaroqsiz ovqatdan zaharlandi

Isroil bosh vaziri Binyamin Netanyaxu 20 iyul kuni “yaroqsiz yoki buzilgan” oziq-ovqatdan zaharlanish oqibatida ichak yallig‘lanishi va suvsizlanish bilan shifoxonaga yotqizildi. Bu haqda Isroil hukumatining rasmiy sahifasi orqali ma’lumot berildi. Tibbiyot xodimlari Netanyaxuga tomir orqali infuzion davolash choralarini ko‘rmoqda.

 

Shifokorlar bosh vazirga kamida uch kun davomida ish faoliyatini uyidan turib olib borishni tavsiya qilishgan. Uning sog‘lig‘i hozirda barqaror deb baholanmoqda. Shunga qaramay, Netanyaxuning kundalik ish rejimi vaqtincha o‘zgartirilgan.

 

Netanyaxuning bu sog‘lig‘i bilan bog‘liq muammolari sud jarayonlariga ham ta’sir ko‘rsatmoqda. Unga qarshi 2024 yil dekabr oyidan beri pora olish, firibgarlik va jamoat ishonchini suiiste’mol qilish ayblovlari bo‘yicha tergov ishlari davom etmoqda. 21-22 iyul kunlari bo‘lib o‘tishi rejalashtirilgan sud majlislari vaqtincha qoldirilgan.

 

Ma’lumot uchun, 2023 yilda ham Binyamin Netanyaxuga yurak stimulyatori o‘rnatish bo‘yicha jarrohlik amaliyoti o‘tkazilgan edi. Bu operatsiya yurak ritmini kuzatish natijasida zarur deb topilgan.