Suriya Turkiyadan yordam so‘radi
Bu yordam Suriyaning hududiy yaxlitligini saqlash, siyosiy birlikni qo‘llab-quvvatlash va mintaqaviy barqarorlikni ta’minlashga qaratilgan.
Turkiya Milliy Mudofaa vazirligi (MSB) vakili Tug'amiral Zeki Akturk 23 iyul kuni IDEF 2025 xalqaro mudofaa sanoati ko‘rgazmasida o‘tkazilgan matbuot anjumanida Suriyaning yangi hukumati tomonidan rasmiy yordam so‘ralganini tasdiqladi. Bu haqda Anadolu nashri xabar bergan.
"Suriyaning yangi hukumati tomonidan, ayniqsa DAISh (ISIS) va boshqa barcha terroristik guruhlarga qarshi kurashda hamda mudofaa imkoniyatlarini mustahkamlash maqsadida, Turkiyadan rasmiy yordam so‘ralgan. Ushbu so‘rov doirasida biz harbiy tayyorgarlik, maslahat va texnik yordam ko‘rsatishga tayyormiz," — dedi Akturk.
MSB bayonotiga ko‘ra, bu yordam Suriyaning hududiy yaxlitligini saqlash, siyosiy birlikni qo‘llab-quvvatlash va mintaqaviy barqarorlikni ta’minlashga qaratilgan. Shuningdek, Turkiya Suriyadagi tinchlikni mustahkamlash va terror tahdidlariga qarshi strategik hamkorlikni davom ettirish tarafdori ekanini bildirdi.
MSB manbalariga ko‘ra, Turkiya va Suriya hukumati o‘rtasidagi ushbu yaqin hamkorlik mintaqada ijobiy geosiyosiy o‘zgarishlarga turtki bo‘lishi mumkin.
