O‘zbekiston Prezidentiga butun dunyodan tabriklar kelmoqda

O‘zbekiston Respublikasi Prezidenti Shavkat Mirziyoyev tug‘ilgan kuni munosabati bilan bir qator davlatlar va xalqaro tashkilotlar rahbarlari tomonidan samimiy tabriklar yo‘llandi.

 

Tabrik yo‘llaganlar qatorida Rossiya Federatsiyasi Federatsiya Kengashi Raisi Valentina Matviyenko, Koreya Respublikasi Prezidenti Li Chje Myon, Turkiya Respublikasi Prezidenti Rejep Tayyip Erdoğan, Birlashgan Arab Amirliklari Vitse-prezidenti Shayx Mansur Ol Nahayon, Sankt-Peterburg shahri gubernatori Aleksandr Beglov, Misr, Mo‘g‘uliston, Serbiya, Armaniston, Sloveniya kabi davlatlar, shuningdek, Shanxay Hamkorlik Tashkiloti, Xalqaro maslahat kengashi kabi tuzilmalar rahbarlari ham bor.

 

Murojaatlarda davlatimiz rahbarining shaxsiy fazilatlari, strategik dunyoqarashi va yetakchiligida O‘zbekistonda amalga oshirilayotgan keng ko‘lamli islohotlar, mamlakatning xalqaro maydondagi nufuzi va mintaqa tinchligiga qo‘shayotgan hissasi yuksak baholandi.

 

Tabriklarda Prezident Shavkat Mirziyoyevga mustahkam sog‘lik, oilaviy baxt, fidokorona davlatchilik faoliyatida yanada katta muvaffaqiyatlar, do‘st O‘zbekiston xalqiga tinchlik, barqarorlik va ravnaq tilaklari izhor etildi.

 

Suhbatlar chog‘ida O‘zbekistonning mazkur davlat va mintaqalar bilan keng qamrovli strategik sheriklik, ittifoqchilik va ko‘p qirrali hamkorlik munosabatlarini yanada mustahkamlash masalalari muhokama qilindi.

 

Tomonlar oliy darajada erishilgan kelishuvlarni hayotga tatbiq etish, o‘zaro savdo-iqtisodiy aloqalarni kengaytirish, kooperatsiya loyihalarini amalga oshirish, madaniy-gumanitar almashinuvni chuqurlashtirishga alohida e’tibor qaratdilar.