"Men Tailand va Kambodjani yarashtirish ustida ishlayapman" — Tramp
Tailand va Kambodja o‘rtasidagi keskinlik ortidan AQSh diplomatik vositachilikka tayyorligini bildirdi.
AQSh Prezidenti Donald Tramp Tailand va Kambodja o‘rtasidagi ziddiyatli vaziyatni diqqat bilan kuzatayotganini aytdi va ikki davlatni yarashtirish bo‘yicha ish olib borayotganini ma’lum qildi. Bu bayonot jangovar to‘qnashuvlar fonida yangradi — chegarada harbiy harakatlar va diplomatik keskinliklar ortmoqda.
“Men Tailand va Kambodjani yarashtirish ustida ishlayapman”, — dedi Tramp qisqa bayonotida.
23-iyul kuni Tailand hukumati Kambodja bilan diplomatik munosabatlarni pasaytirib, o‘z elchisini chaqirib oldi va Kambodjaning Bangkokdagi elchisini chiqarib yuborishini e’lon qildi. Bunga sabab — Tailand hududida yuz bergan mina portlashi natijasida harbiy xizmatchining oyog‘i uzilgani bo‘ldi. Tailand hukumati bu minaning yaqinda o‘rnatilganini da’vo qilmoqda.
Shuningdek, barcha chegara nazorat punktlari yopildi va turistik kirish qat’iyan taqiqlab qo‘yildi. Tailand Tashqi ishlar vazirligi rasmiy norozilik bayonotini Kambodja tomoniga yuborgan.
Kambodja Tashqi ishlar vazirligi Tailand ayblovlarini rad etib, sodir bo‘lgan portlash sobiq urushdan qolgan minalar bilan bog‘liq ekanini bildirdi. Rasmiy bayonotda aytilishicha, Tailand askarlari kelishilgan patrul yo‘nalishlaridan chetga chiqqan va xavfli hududga kirib qolgan.
Chegaraning bir nechta nuqtasida artilleriya otishmalari qayd etilgan. Ijtimoiy tarmoqlarda Kambodja armiyasining RM-70 reaktiv artilleriya tizimlaridan Tailand tarafga qarata o‘t ochayotgani aks etgan videolar tarqaldi. Bunday mojaro turizm va mintaqaviy xavfsizlikka tahdid solmoqda.
Vaziyat xalqaro darajada xavotir uyg‘otmoqda. AQShning vositachilik taklifi mojaro avj olishining oldini olishga qaratilgan. Ayni vaqtda tomonlar o‘z pozitsiyalarida qat’iy qolmoqda. BMT va ASEAN a’zolari ham kelgusi kunlarda munosabat bildirishlari kutilmoqda.
