Tailand va Kambodja o‘rtasidagi o‘t ochishni to‘xtatish bo‘yicha kelishuvga erishildi

Tailand va Kambodja o‘rtasidagi keskinlashgan chegara nizosi ortidan har ikki davlat o‘t ochishni to‘xtatish bo‘yicha kelishuvga erishdi. Bu haqda Malayziya Bosh vaziri Anvar Ibrohim rasmiy bayonot berdi.

 

Malayziya taklif qilgan sulh tashabbusiga Tailand rozilik bildirganini ma’lum qildi. Biroq Bangkok rasmiylari shartnomani amalga oshirish "hududdagi real sharoitlarga bog‘liq bo‘lishini" qayd etishdi. Anvar Ibrohimning aytishicha, tomonlar kelishuvga erishgan bo‘lsa-da, harbiylar joylarda turgani sababli kuchlarni olib chiqish uchun biroz vaqt so‘ralgan.

 

So‘nggi ikki kun ichida Tailand va Kambodja chegarasida yuzaga kelgan qurolli nizo kamida 20 kishining umriga zomin bo‘ldi. 130 mingdan ortiq aholi xavfsiz hududlarga evakuatsiya qilindi. Har ikki tomon bir-birini mojaro boshlanishida ayblamoqda. Tailand harbiylari Kambodjani BM-21 raketa tizimi bilan tinch aholi punktlariga zarba berganlikda aybladi.

 

Kambodja hukumati Tailandni klaster bombalardan foydalanganlikda ayblab, bu xalqaro huquqning jiddiy buzilishi ekanini ta’kidladi. Tailand esa bu qurollardan harbiy nishonlarga nisbatan "proportsionallik printsipi" asosida foydalanganini bildirdi. Shuningdek, janglar natijasida Preah Vihear tarixiy yodgorligiga zarar yetgani aytilmoqda — bu ma’lumot Tailand tomonidan rad etildi.

 

Markaziy Osiyo strategik tadqiqotlar markazi eksperti Andreyka Natalegavaga ko‘ra, har ikki davlat to‘liq urushni ko‘tarmaydi. U mojaroni hal etish uchun neytral kuzatuvchi yoki uchinchi tomon aralashuvi zarurligini ta’kidladi. ASEAN tarixida ilk marta ikki a’zo davlat o‘rtasida bunday darajadagi harbiy to‘qnashuv kuzatilmoqda. Bu esa mintaqaviy tashkilot uchun jiddiy sinov bo‘lmoqda.